Furacu

Horariu

Martes a xueves: 16:00h a 18:30h
Vienres a domingu: 11:00h a 14:00h y 16:00h a 20:00h

Emplazamientu
Instalación
Equipu Creativu
Audioguíes

Los furacos de guxán son estructures hipotétiques que conecten puntos diferentes nel espacio-tiempu y pueden visualizase como túneles con dos estremos en puntos separaos nel
espaciu, el tiempu o dambos.

En teoría, podríen conectar distancies desaxeradamente llargues, como mil millones d’años lluz, puntos diferentes nel tiempu o inclusive universos diferentes. En teoría. Dende la so definición a primeros del sieglu XX, los furacos de guxán alimentaron l’imaxinariu imperial como un elementu fundamental de la ciencia ficción y la fantasía, coincidiendo colos procesos d’industrialización serondos. La mina sigue siendo la esperiencia más averada a un furacu de guxán, al ser la vía d’accesu a lo desconocío.

El mundu del capitalismu carboníferu depende de tal desconocimientu: procesos d’estracción misteriosos y escondíos que la sociedá decide inorar.

La obra de arte ye tamién una alegoría al espaciu de la mina (que ye al tiempu la esperiencia de la modernidá estractiva) y una representación del arquetipu del túnel del espaciu-tiempu de ciencia ficción qu’esta inspiró.

La pieza, formalmente, representa una chimenea minera del revés. Nel so interior miramos pa lo desconocío, l’espaciu-tiempu de la producción natural. Fuera d’ella, tamos nel mundu de la producción social, onde los recursos que tardaron millones d’años n’ensamblase espárdense per tol mundu y consúmense en segundos, onde cada camión cargáu de carbón
conviértese nuna esplosión caleidoscópica d’enerxía con tentáculos que rellumen como centelles per tol planeta.

El furacu captura la imaxinación al ser la entrada al mundu de la mina y a los sos procesos d’estracción astractos, de los que dependemos dafechu y que, sicasí, son tan misteriosos y ocultos.