Manuel Persa
Manuel Persa ye un especialista en diseñu de marca y estratexa conceptual con un enfoque en soluciones de diseñu vanguardistes y sostenibles. Diplomáu pola Escuela Superior d’Arte del Principáu d’Asturies (ESAPA), siguió la so formación con un Máster en presentaciones Multimedia na Escola Superior de Disseny i Enginyeria de Barcelona (ELISAVA). Persa trabaya como director creativu en Volumínica Studio, onde lidera proyectos de diseñu gráficu y multimedia. Amás, ye investigador nel Llaboratoriu Biomiméticu, desenvolviendo conceptos nuevos nel campu de la biomaterialidá.
Los sos saberes incluyen tanto los sistemes nuevos de fabricación como la impresión 3D, el corte láser y CNC, amás de técniques más artesanales, como l’origami, el trenzáu de fibres vexetales y l’alfarería. El so trabayu nel Llaboratoriu Biomiméticu incluye la esploración y aplicación de biomateriales, inspirándose en procesos naturales p’anovar nel diseñu sostenible.
Marlén López
Arquitecta (ETSAC), Máster n’Arquitectura Biodixital (ESARQ-UIC) y Doctora Cum Laude dende’l 2017 pola Universidá d’Uviéu y la University College London (UCL).
Ente los años 2013 y 2020 formó parte de la Universidá d’Uviéu, como investigadora nel grupu GICONSIME y como xestora na Cátedra MediaLab, desenvolviendo proyectos d’investigación d’aplicación de la biomímesis a l’arquitectura y la inxeniería al traviés de les tecnoloxíes nueves de fabricación dixital.
Anguaño compaxina’l so trabayu como arquitecta y diseñadora en Volumínica Studio cola dirección del área d’educación y divulgación científica del Llaboratoriu Biomiméticu en Llaíñes, Parque Natural de Redes. Nesti tiempu desenvolvió bien de proyectos arquitectónicos y proyectos d’investigación de calter híbridu y multidisciplinar, axuntando un bon númberu de publicaciones, ponencies y conferencies en congresos internacionales. Amás foi convidada como revisora d’artículos científicos y como mentora y xuráu en dellos eventos, y la so obra formó parte de distintes esposiciones, recibió premios y reconocimiento y el so trabayu apaeció en munchos medios de comunicación.
Con una esperiencia amplia y vocación como docente y divulgadora, nos últimos años creó dellos programes educativos y una metodoloxía d’aprendimientu innovadora tocante al diseñu bioinspiráu, collaborando con universidaes y instituciones educatives y culturales como’l Muséu Guggenheim de Bilbao, el Muséu de Belles Artes d’Asturies, la Fundación Princesa d’Asturies, la Fundación Cerezales Antonino y Cinia, UNIR, Llaboral Centru d’Arte, BID-DIMAD o Tabakalera Centru Internacional de Cultura Contemporánea, ente otros. Destaca’l programa educativu de calter internacional SummerLab BioDesign y la Escuela de Biodiseñu, un proyectu d’aprendimientu pa fomentar la reconexón de les families y educadores cola Naturaleza, promoviendo la creatividá y el pensamientu innovador en neños y neñes, al traviés de la esperimentación científica, el diseñu, l’arte y la tecnoloxía.
Nesti añu 2024 van salir a la venta los sos dos primeros llibros, sobre educación na Naturaleza y divulgación científica, coles editoriales españoles Litera Libros y Next Door Publishers, respectivamente.
LLABORATORIU BIOMIMÉTICU
Llaboratoriu Biomiméticu ye un sitiu multidisciplinar nel Parque Natural de Redes, Asturies, creáu y dirixíu por Marlén López, doctora arquitecta biodixital, y Manuel Persa, diseñador gráficu y artesanu dixital. Al traviés de la biomímesis y la converxencia ente arte, diseñu y ciencia, el llaboratoriu dedícase a la esploración, el diseñu y la educación na intersección de la naturaleza y la tecnoloxía.
Enfocáu na innovación sostenible y el diseñu bioinspiráu, Llaboratoriu Biomiméticu busca tresformar les estratexes adaptatives de la naturaleza en soluciones creatives y tecnolóxiques aplicables a los desafíos contemporáneos. Les árees d’actuación principales son el desenvolvimientu de proyectos de diseñu bioinspiráu, la creación de dellos programes d’educación y divulgación y, tamién, los servicios de consultoría.
Dende la so fundación nel 2020, Llaboratoriu Biomiméticu collaboró con instituciones, fundaciones y universidaes internacionales, y foi reconocíu pola so capacidá pa fundir la creatividá cola innovación sustentable, con proyectos y enfoques educativos que llamaron l’atención de bien de medios de comunicación.