Pozu San José

Pue que lo que más llame l’atención del visitante que nun conoz esti pozu San José seya lo averáu que ta a les viviendes, heriedu de los cuarteles vieyos de San Francisco y, como telón de fondu, onde va tiempu hubo una escombrera escomanada vemos un relieve suave que la vexetación reconquistó, prueba del aciertu nel so tratamientu, que-y da una apariencia natural.

El que nel so día se conociere como “pozu nuevu” empezó a afondase en 1949, obligando una vez más a esviar y encalzar el ríu, cuando la empresa Hulleras del Turón, la mesma qu’impulsó Santa Bárbara o Espinos, prevía que se diben escosar les reserves de carbón de monte. Con él algamó máximos históricos na so producción.

Foi inauguráu oficialmente pol ministru d’Industria’l 25 de setiembre de 1957, xusto al par qu’ENSIDESA n’Avilés: un día y dos fitos de la historia del trabayu n’Asturies, carbón y aceru. Caltúvose en producción hasta 1993. Rematada la rehabilitación que l’equipu de Víctor García Oviedo y Proyecta realizaron nel 2008, abre agora les puertes a los visitantes pela primer vez.

El castillete, del tipu Dörnen 2, foi’l primeru de la so clas llevantáu n’Asturies. Pintáu agora de coloráu, esta estructura de 25 metros dio serviciu a un pozu de mediu quilómetru de fondura articuláu en 7 plantes. Esi castillete domina un conxuntu d’instalaciones que resulten de la collaboración del arquitectu Francisco González López–Villamil y l’inxenieru Ildefonso Sánchez del Río; anque delles pieces desapaecieren, pue entendese la organización del procesu con claridá.

Hai dos edificios de diseñu sobriu, dos pabellones que zarren una especie de plaza central onde s’abre la caña del pozu: vistos dende la cai, el primeru a la derecha foi casa de máquines y compresor, ordenada con pórticos de formigón y cubierta de pizarra, onde s’abren ventanales amplios. L’otru, a la esquierda, que cumple güei funciones formatives, acoyó taquilles, vestuarios, casa de baños y llampistería, amás d’oficines y archivu.

Quiciabes lo más llamativo seya la sala del embarque, la caseta de basculación y la cubierta de les cintes de reunviu d’estéril o cadena d’arrastre, nes que s’aplicó una estructura singular de formigón armao y solera cerámica. Organízase con bóvedes de cáscara de tipu llaminar, sofitaes en pórticos tresversales de tipu hiperestáticu, un diseñu modernu y bien plásticu qu’ufierta rotundidá y dalguna llixereza. Una solución práctica y atrevida.

Comparten un aire de familia coles marquesines que pueden vese al otru llau de la carretera, al nuestru llombu, onde cuatro pies derechos de directriz parabólica allárguense nuna llosa inclinada de sección variable. Los gabitos qu’entá se ven valíen pa colgar les bicicletes de los trabayadores, a techu de les inclemencies, y son quiciabes el detalle más personal, porque evidencien lo que los edificios güei yá nun cunten, que foi un sitiu onde trabayaron munches décades cientos de persones.

Mui cerca atópase un monumentu inauguráu nel 2006 pol Conceyu, dedicáu a tolos mineros finaos n’accidente llaboral nel valle (más de mil) que s’emplaza no que foi una bocamina del grupu de monte San Francisco – San José, el que precedió al pozu que nos ocupa.