Funda

Una funda ye aquello que cubre daqué pa protexelo. Una tela azul y naranxa yera la envoltura que mediaba ente los cuerpos y les fondures carboníferes. Les fundes de los mineros xubíen y baxaben, conectando superficie y interior terrestre, ennegreciéndose acaldía hasta que les llavaben y arremendaben les muyeres.

L’arquitectura como funda ye la interfaz —y pue ser la cuidadora— ente’l ser humanu y la so redolada, dende’l cuerpu hasta’l paisaxe. Tien la capacidá de filtriar o segregar, ser porosa o estanca, estableciendo vínculos acullá de lo tanxible. Na so dimensión material, l’arquitectura como funda despliega redes d’axentes, acciones y recursos.

Si’l carbón ye la materia central que da forma a tipoloxíes arquitectóniques específiques como’l Pozu Sotón, el pabellón asitiáu na so base articúlase como un ensamblaxe de materies perifériques. Ta construyíu con elementos que nun se conecten de manera directa col procesu estractivu, pero que manifiesten la so afectación dende les persones (cola tela) hasta los sistemes hidrográficos (col sable), pasando pelos montes, cola madera.

L’arquitectura como funda revela, cuestiona y pon en valor rellaciones crítiques nel territoriu, pudiendo xenerar espacios de pertenencia. Asina, la morfoloxía circular del pabellón esplora la capacidá asamblearia de distintes voces y materiales, convirtiéndose en sitiu d’alcuentru nos díes del festival.

Arropada pola repetición de fundes —que recuerden la imaxe de los trabayadores na casa d’aséu o los tendales de les viviendes obreres— asítiase una plataforma pa la celebración d’eventos vinculaos a la cultura oral. ç

Les pieces de 50×70 cm tán ellaboraes pola Fundación Llaboral Santa Bárbara (FUSBA) col mesmu texíu de les fundes mineres, y van poder reutilizase na nuestra vida cotidiana pa tresportar dende comida a ferramientes. Esta forma colectiva fai visible’l paisaxe inmaterial de les maneres de vida que construyen les cuenques, dende los cantares a los saberes gremiales.