El Cuadro Blanco

Existe un elementu d’entibación qu’ensin él los túneles de la mina diben esbarrumbar: el cuadru. Existe un cuadru puestu nel límite ente la (relativa) seguranza y el peligru. Esti cuadru ta pintáu de blancu.

Na so primer instalación sonora, LOFÁCIL garren esta realidá como puntu de partida pa espresar los límites d’incerteza comunes a la esperiencia humana, proponiendo un percorríu al traviés del paisaxe sonoru mutable confeccionáu a partir de l’arquitectura auditiva de la mina del Pozu San Luis. Esti paisaxe vuélvese tanxible (¡y visitable!), al habitar el Pabellón “Mirador bajo la Escombrera” del arquitectu astur-xaponés Key Portilla Kawamura na rodiada del Pozu Espinos.

Quien lo visiten en carne y güesu, van poder buscar a manera de xuegu de pistes, detectar y esperimentar dellos límites sonoros. Existe un elementu aliáu, presencia amiga que va poder (si quieren) guiar los sos pasos: un cantar pop. Ésti invoca la capacidá universal de comunicar de corazón a corazón la memoria del Sitiu, los Ecos que caltienen y reflexen la so Inmensidá. Van tener la oportunidá d’esplorar nos sos dispositivos electrónicos la so espresión visual y interactiva, un entornu virtual creáu cola artista visual Alba Matilla y el videógrafu y artista 3D Diego Paredes.

El cantar ye la unidá mínima de tresmisión d’un conxuntu d’emociones lligaes a una historia común – la esperiencia humana. El Territoriu atópase na arquitectura emocional de los Sitios, la so testura y conciencia colectiva. El Cuadru Blancu transita’l límite ente dambes realidaes.