Horariu
Martes a vienres: 16:30h a 20:00h
Sábadu y domingu: 11:00h a 14:00h y 16:30h a 20:00h
Emplazamientu
Instalación
Equipu Creativu
Audioguíes
L’averamientu al proyectu parte de querer entender la historia y la complexidá d’esti territoriu, trabayar cola atmósfera d’esta zona del valle de Turón y proponer una actuación comprometida cola sostenibilidá, con una actuación qu’imaxina un futuru que surde de dellos pasaos del llugar.
El percorríu nuevu propuestu va guiando al visitante pelos llugares de trabayu de la mina. Empieza na esplanada sobre la sub-planta que conecta los castilletes de los pozos, sales de máquines y ventilación, amás de la sala de máquines vieya tresformada en muséu.
Reabre al públicu, temporalmente, la pasarela que conecta esti espaciu cola esplanada onde se cargaba’l carbón. Esti espaciu, ganáu al monte y construyíu sobre una muria de piedra na vertiente sur d’El Río Turón, forma un balcón que dexa contemplar dafechu les instalaciones del pozu. La horizontalidá y vexetación d’esti espaciu contrasta cola pendiente tan pindia y les mates exuberantes y madures.
Un camín construyíu a partir de la llimpieza cuidadosa de la vexetación dexa redescubrir les víes qu’ocupaben esti espaciu y llevaben el carbón a les tolves. Báxase pel oeste, siguiendo’l marxe de la canal en piedra del ríu, onde había accesos a la subplanta y per onde circulaba’l tren de vía estrecha que conectaba les instalaciones mineres principales del valle pa cruciar depués a la Plaza de la Madera, pasar pel esterior del economatu y volver xubir peles escalinates vieyes ente esti espaciu y la esplanada.
Búscase caltener na memoria a los trabayadores y los sos oficios, amás de la magnitú del complexu mineru.
El pabellón asítiase na esplanada de carga. Ye una estructura en madera circular llixera, inspirada en construcciones industriales como les tolves, los castilletes o les pontes del tren. Llímpiase un camín mínimu sobre la llosa de formigón que cubre’l suelu, habitada por plantes pioneres.
La estructura ta cubierta por pintura realizada polos creadores con pigmentu a partir de carbón, y ye d’un negru mate puro que garra dafechamente la lluz.
El so aspectu industrial cambia desque’l visitante entra y descubre un paisaxe sobre’l planu interior del techu, fechu partir de tapinos o fragmentos de verde recortaos de la mesma esplanada. Esta cubierta inspírase nes cubiertes vexetales tradicionales n’Asturies, sobre manera nes denominaes «de tapín», que tuvieron presentes en munches zones del Principáu, incluyíu’l conceyu de Mieres.
Esti xardín eleváu dexa que pensemos sobre la potencialidá de técniques locales constructives o de manexu del territoriu preindustriales, y aumenta la riqueza de paisaxe postindustrial que ta renaturalizando la redolada del pozu, xenerando un paisaxe nuevu y ricu en biodiversidá y tolerante a les condiciones climátiques nueves.
Dientro del pabellón, un bancu circular protexíu del sol dexa facer una posa pa contemplar un suelu negru, a base de carbón, onde una llámina pequeña d’agua reflexa la lluz y nun dexa al observador entender la so fondura, de la mesma manera que somos incapaces a entender la escala y la fondura del pozu.